Suspek nailhan, tsinelas nahibilin sa crime scene
GI-ATNGAN: Nagbuy-od nga nabulit sa dugo ang foreman nga si Rodel Solamo ug diriyot mapunggot ang iyang liog human gitigbas sa iya ra sab nga sakop nga construction worker. Gikatahong selos ang hinungdan kay gidudahan ang foreman nga nalambigit sa asawa sa suspek nga si Julito Camanse, 43. / Tampo
Published on
:
Patay nang naabtan sa kapulisan sa Compostela ang foreman nga nahay-ad sa agianan nga nagkadugo ang bahin sa iyang liog human gitigbas sa iya ra sab nga kauban nga constructiion worker.
Ang insidente nahitabo sa Purok 7, Barangay Dapdap, Lungsod sa Compostela, pasado alas 2 sa kadlawon Pebrero 1, 2025.
Ang biktima nga si Rodel Solamo, taga Barangay Cantumog, Lungsod sa Carmen ug gihulagway nga diriyot maputol ang iyang liog agi sa tinigbasan.
Samtang ang suspek iya ra sab nga sakop nga construction worker nga si Julito Camanse, 43, minyo nga taga Brgy. Licos, Danao Ctiy.
Way nakasaksi sa hitabo apan tungod sa kolor blue nga tsinelas nga nahibilin sa crime scene nasubay ang suspek hinungdan nga dali nga nadakpan.
Nasayran sa Superbalita Cebu pinaagi sa interview ngadto ni PSMS Junrey Frias sa Compostela Police nga biktima gikan nga nag-inom sa usa ka tindahan sa maong lugar ug nilakaw kay gihatod niini sa pagpauli ang iyang higala nga babaye nga nailhan sa pangalang Jesil.
Mibalik sa agi si Solamo nga nag-inusara ug pag-abot sa mingaw ug hilit nga dapit, kalit nga giatake sa usa ka lalaki nga nagbitbit og sundang.
Diriyot mabuwag ang ulo sa biktma sa grabeng samad iyang nahiaguman.
Maayo nalang sa gihimong imbestigasyon sa kapulisan nasigpatan ang usa ka tsinelas nga diha sa nahitaboan. Sa dihang gisubay, ang kaubang construction worker miila sa tag-iya sa maong tsinelas nga gipanag-iya ni Camanse.
Ang suspek nasikop sa kapulisan didto sa ilang panimalay nakuha sab ang sundang.
Matod ni Police Master Sgt. Daryl Rondina, imbestigador sa Compostela Police Station nga ang suspek miangkon sa kremin, ug naghambin og kalagot ngadto sa biktima sa dihang nasakpan niini nga giingong tulo na diay ka buwan nga adunay relasyon ang suspek ngadto sa iyang asawa.
“Lagot kaayo siya kay nasakpan man niya nga naglambinglambing sa iyang asawa. Human niya tigbasa sa liog pagkatumba iyahang gigulgol hapit naputol,” dugang ni PMS Rondina. / DVG / GPL